Қытай Қырғызстанның әлеуметтік-экономикалық дамуын қолдауға 100 млн доллар бөледі
Қытай Қырғызстанның әлеуметтік-экономикалық дамуын қолдау мақсатында 650 млн юань (шамамен 100 млн доллар) бөлуге әзір. Бұл туралы Қытайдың сыртқы істер министрі Ван И 16 қыркүйекте Қырғызстан президенті Садыр Жапаровпен кездесуде мәлімдеді.
Олар Душанбеде жүздескен. Тәжікстан астанасында ҰҚШҰ Ұжымдық қауіпсіздік кеңесінің саммиті мен ШЫҰ-ға мүше елдер басшылары кеңесінің отырысы өтіп жатыр.
Қырғызстан басшысы баспасөз қызметінің хабарлауынша, тараптар Қырғызстан мен Қытай қарым-қатынасын дамыту мәселелерін талқылаған. Сонымен бірге кездесуде қауіпсіздік пен қорғаныс, сауда және экономика салаларындағы әріптестік, инвестиция тарту мәселелері сөз болған.
Садыр Жапаров «Қытай-Қырғызстан-Өзбекстан» темір жолы құрылысы мәселесін де көтеріп, бұл жобаның Қырғызстанға ғана емес, бүкіл аймақ үшін маңызды екенін, қырғыз тарапы осы мәселе бойынша белсенді диалог жүргізуге дайын екенін айтқан.
Ван И болса Қытай үкіметі Қырғызстанға 650 млн юань мен коронавирусқа қарсы вакцинаның бір млн дозасын беруге дайын екенін жеткізген.
newstaraz.kz