Өзбекстанда вакцина салдырған студенттерге он пайыз жеңілдік береді
Өзбекстанда ақылы бөлімде оқитын студенттер коронавирусқа қарсы вакцинаны өз еркімен салдырғаны үшін он пайыз жеңілдік алады.
Өзбекстанның жоғары және орта арнайы білім министрлігі осылай деп хабарлады.
Министрлік мәліметі бойынша, жоғары оқу орындарында оқитын 18 жастан асқан студенттерге мемлекет бюджетінен тегін вакцина салынып жатыр.
Бұның алдында республикада коронавирус жұқтырғандардың күрт көбеюіне байланысты үкімет компаниялар мен ұйымдарға қызметкерлеріне тез арада вакцина салуды тапсырған. Кейбір мекемелерге қытай-өзбек вакцинасын салу міндеті қойылған.
Өзбекстанның денсаулық сақтау министрлігінің мәліметі бойынша, 30 шілдеде Қытайдан ZF-UZ-VAC2001 қытай-өзбек вакцинасының тағы 1 миллион дозасы келді.
Осы уақытқа дейін Өзбекстанға вакциналардың 6,5 миллион дозасы импортталды.
newstaraz.kz