Блогер Өзбекстан тауларынан Мирзияевтің құпия резиденциясын тапқан (видео)
Өзбекстандық блогер Алексей Гарши өлкенің шығысындағы таулардан президент Шавкат Мирзиявке арналып салынған саяжайдың видеосын интернетке жариялады.
Видеодан таулы аймақтағы президент резиденциясын, оны қоршаған бау-бақшаларды және су қоймасын көруге болады. Бұдан бөлек онда тік ұшақтар қонатын алаңшалар мен екі үлкен ғимарат бар екені айтылады.
Осыған дейін әлеуметтік желіде белгісіз жердегі бұл жайдың видеолары мен суреттері жарияланған.
Биыл ақпан айында Азаттықтың өзбек қызметі Мирзияевке арнап салынған хансарай жөнінде журналистік зерттеуін жариялаған. Онда Ташкенттен 100 шақырым қашықтықтағы Угам-Чаткал ұлттық саябақ аймағында орналасқан ғажайып жердегі ақсарай туралы мәлімет берілген.
Кейін Мирзияев бұл сарай жөнінде түсініктеме беріп, бұл орын мемлекеттің қарамағында екенін айтқан.
newstaraz.kz