Ресей паспортына ие мигранттар соғыс туралы «фейк» таратқаны үшін азаматтықтан айрылуы мүмкін

Ресей думасы өткен аптада «Ресей Федерациясының азаматтары туралы» заңның жаңа нұсқасын екінші және үшінші оқылымда қабылдады.

Құжатта Ресей паспортын алғандар «ұлттық қауіпсіздікке қатер төндіретін әрекеті», соның ішінде әскери «фейк» пен Ресей әскерін «алалағаны» үшін азаматтықтан айрылатыны жазылған.

Жаңа тәртіпке сәйкес, әскерден қашқандар, армия мен еріктілерді алалайтын фейк ақпарат таратқандар, жаппай тәртіпсіздікке қатысқандар, митинг туралы заңды бірнеше мәрте бұзғандар, әскери қызметтен жалтарғандар, шетел агенттері туралы заңнамаларды орындамағандар азаматтықтан айрылуы мүмкін.

Осындай себептермен азаматтықтан айрылғандар Ресей азаматтығына кем дегенде үш жылдан кейін ғана өтініш бере алады.

РФ конституциясына сәйкес, Ресей аумағында туған азаматтарды азаматтықтан айыруға болмайды.

Орталық Азияда туған көптеген адам кейінгі жылдары Ресей азаматтығын қабылдаған. Былтыр Ресей паспортын алғандардың 43 пайызы (шамамен 300 мың адам) Украинаның бұрынғы азаматтары (негізінен «ДХР» және «ЛХР»-де тұратындар).

Источник