Reuters: Өзбекстанда балалардың өліміне алып келген шәрбаттың құрамында улы зат болған
Үндістанның Marion Biotech компаниясы өнімдеріне фармацевтикада қолдануға болмайтын заттарды қолданып, Өзбекстанда 20-ға жуық баланың өліміне себеп болған. Бұл туралы Reuters агенттігі жағдайды жақыннан білетін екі дереккөзіне сілтеме жасап хабарлады.
Агенттік мәліметі бойынша, Marion Biotech шәрбатына қолданылған пропиленгликолды Maya Chemtech India компаниясынан сатып алған. Фармацевтикалық материалдарды сатуға лицензиясы жоқ бұл компания өкілдері олар сатқан пропиленгликолды өндірістік мақсатта ғана қолдануға болатынын мойындаған.
«Біз Marion Biotech бұл затты жөтел сиробын дайындауда қолданғысы келгенін білмедік», — дейді Maya Chemtech India компаниясының атын атағысы келмеген өкілі.
Агенттіктің екі бұлағы сироптың құрамында сұйық кір жуатын құралдар, антифризді және басқа да улы заттарды өндіруде қолданылған пропиленгликол бар екенін жеткізді.
Былтыр жыл соңында Өзбекстанда «Док-1 Макс» шәрбатын ішкеннен кейін 20 бала қайтыс болды.
newstaraz.kz