Шри-Ланка президенті қызметтен кетпеді, бірақ елден қашты
Шри-Ланка президенті Готабая Раджапакса сәрсенбі күні таңертең елден қашты. Жаппай наразылыққа шыққан халық оның қызметтен кетуін талап еткен. Мәліметтерге қарағанда, президент әскери ұшақпен Мальдив аралдарына қонған.
Бірнеше күн бұрын наразы топ Коломбо қаласындағы президент сарайын басып алды. Раджапаксаны әскер қорғап қалды. Парламент спикері президент 13 шілдеде қызметтен кетуге келісті деп мәлімдеді. Алайда ол елден қашқан уақытта мемлекет басшысы қызметінен кететіні туралы мәлімдеме жасамаған. Бұл хабарды естіген халық одан сайын ашуланды.
Шри-Ланка премьер-министрі Ранил Викремесингхе өзін президент міндетін атқарушы деп жариялап, елде төтенше жағдай жарияланғанын мәлімдеді. Алайда наразы халық премьердің де қызметтен кетуін талап етіп отыр. Коломбодағы үкімет ғимаратына шабуыл жасалғаны туралы мәлімет тарады.
Шри-Ланкадағы наразылыққа елдің жаңа тарихындағы ең ауыр экономикалық дағдарыс себеп болды.
newstaraz.kz