Тәжік президенті: «Талибан» этникалық топтарға қарсы агрессивті саясатын жалғастырып жатыр
«Талибан» қозғалысы Ауғанстандағы этникалық топтарға қарсы агрессивті саясатын жалғастырып жатыр. Осылай деп Тәжікстан президенті Эмомали Рахмон Шолпан атада өткен Орталық Азия мемлекеттері басшыларының кездесуінде айтты.
Эмомали Рахмон сөзінде «Талибан» радикалды діни саясатын жалғастырып, Ауғанстан халқына көптеген тыйымдар мен шектеулер қойып жатыр деді.
«Бір жыл ішінде «Талибан» қозғалысы халықаралық қауымдастық алдында билігінің заңдылығын дәлелдейтіндей ешбір оң қадам жасаған жоқ. Керісінше, түрлі этникалық топтарға қысым көрсетіп келеді», — дейді Эмомали Рахмон.
Тәжікстан Ауғанстанда этникалық топтардың қатысуымен инклюзивті үкімет құруды қолдап келеді. Ондағы этникалық тәжіктер де билікке араласуы тиіс деп есептейді.
Тәжік президенті Ауғанстандағы жағдай тек Орталық Азияға ғана емес, Еуразия континентіне кері әсерін тигізеді деп алаңдайды.
Соңғы төрт айда Ауғанстан аумағынан Тәжікстан және Өзбекстан аумағына қарай бірнеше снарядтар лақтырылды. Тәліптер бұл «Ислам мемлекеті» экстремистік тобының әрекеті деп мәлімдеген.
Былтыр тамыз айында «Талибан» қозғалысы Кабулды басып алған. Ауғанстан президенті Ашраф Ғани Біріккен Араб Әмірліктеріне қашып кетті.
newstaraz.kz