Тәжікстан ҰҚШҰ әскери альянсынан тәжік-ауған шекарасын қорғауға көмектесуін сұрады
Тәжікстан Ұжымдық қауіпсіздік туралы шарт ұйымының мемлекеттерінен тәжік-ауған шекарасын қорғауға көмектесуін сұрады. Ресей басқаратын әскери альянсқа бірқатар бұрынғы совет республикалары кіреді.
«Аймақта қалыптасқан жағдайды, бұған қоса Ауғанстанмен шекарадағы кейбір жерлер тауда орналасқанын ескерсек, шекараны жалғыз қорғау қиынға түседі», – деді альянстағы Тәжікстан өкілі Хасан Султонов. Оның айтуынша, Ауғанстанның тәжікстанмен шекаралас аймақтарында тәліптер үкімет әскеріне шабуыл жасап, содырлардан қашқан бір жарым мыңға жуық ауған жауынгері тәжік-ауған шекарасынан өтті.
Бұның алдында Мәскеу одақтас мемлекеттерге қолдау көрсететінін мәлімдеген. «Қажет болған жағдайда, Ресей Тәжікстанға шекара қауіпсіздігін қамтамасыз етуге көмектеседі», – деп мәлімдеді 6 шілдеде Ресей сыртқы істер министрінің орынбасары Андрей Руденко.
Тәжікстанда Ресейдің 201-әскери базасы орналасқан. Ол Ресейдің шетелдегі ең ірі әскери нысаны.
АҚШ пен НАТО елдері Ауғанстандағы әскерін шығарып жатқан уақытта тәліптердің шабуылы үдей түсті. Батыс коалициясы бұл елдегі күштерін қыркүйектің ортасына дейін толық шығаруды көздеп отыр.
newstaraz.kz