Ташкентте бау-бақшаға зиян келгені үшін әкім мен прокурор қызметінен алынды
Президент тапсырмасы бойынша Ташкенттің Чилназар ауданының әкімі мен прокуроры қызметінен алынды. Жұмысына салғырт қарағаны үшін Ташкент қаласы әкімі Жахонгир Артыкхожаев мен қала прокуроры Улугбек Косимовқа сөгіс жарияланды.
Президент әкімшілігінің жетекшісі Сардор Умурзаков 8 тамызда жиналыс өткізіп, Чилназар көшесіндегі бау-бақшаға зиян келгенін сынға алған.
Өзбекстан президенті баспасөз қызметінің хабарлауынша, жергілікті тұрғындар бау-бақшадағы 100-ден астам талдың кесілуіне наразы болған.
Осының алдында Ташкенттің Чилназар көшесі жөнделіп, жол кеңейтілген. Сол маңдағы талдарды да кесіп тастаған.
Өзбекстанның Экология жөніндегі комитеті 9 еменнің тамырына қатты зиян келгенін, оларды сақтап қалу мүмкіндігі өте аз екенін мәлімдеген.
Қоғам наразылығынан соң Ташкент әкімдігі Чилназар көшесіндегі жобаны қайта қарап, 6 жолақ жолды 4 жолақ жолға дейін қысқартты.
newstaraz.kz