Украинаның Қырғызстандағы елшісі президент әкімшілігі өкілдерімен кездескісі келеді

Украинаның Қырғызстандағы елшісі Валерий Жовтенко 28 ақпандағы баспасөз конференциясында Украинадағы жағдай бойынша Қырғызстанда кімдермен кездескені, кімдермен жүздесетіні туралы айтты.

Елшінің хабарлауынша, ол Қырғызстанның сыртқы істер министрі Руслан Қазақбаевпен кездесіп, оған Ресей басқыншылығының саяси, соның ішінде халықаралық салдары туралы айтып, Қырғызстаннан қолдау сұраған.

«Жауаптың қандай болғанын Қырғызстан сыртқы істер министрлігінің сайтынан көре аласыз. Бұған қоса, мен Еуропа елдерінің Қырғызстандағы елшілерімен, Еуропа одағының Орталық Азия елдері жөніндегі үйлестірушісімен кездестім. Ол Бішкекте Қырғызстан президенті Садыр Жапаровпен кездесу белгілеген. Одан менің ақпаратымды президентке жеткізуімді сұрадым. Осы аптада СІМ өкілдерімен жаңа кездесулер болады. Мен президент әкімшілігінің өкілдерімен де кездесіп, не болып жатқанын жеткізгім келеді. Оқиға тез өрбіп жатыр, жалған ақпарат көп, сол себепті мен дұрыс ақпарат жеткізуді маңызды деп санаймын», — дейді елші.

Ресейдің Украинаға басып кіргеніне бес күн болды. Елдің солтүстігінде, шығысында және өңтүстігінде ұрыс жүріп жатыр. Украинаның ірі қалалары түнде атқылануда, бірақ билік Ресей шабуылына тойтарыс бердік деп отыр.

Украина билігінің хабарлауынша, соғыста Ресейдің үш мыңнан астам жауынгері қаза тапты, Ресей билігі адам шығыны барын мойындағанымен, қанша сарбаз қаза тапқанын айтпады. Украинаның жүздеген азаматы опат болды, олардың арасында бейбіт тұрғындар да бар.

Источник