Ақтөбеде жалған хабар таратқан интернет-террорист іздестіріліп жатыр
2 қыркүйекте Ақтөбе қаласындағы алты мектеп «жарылғаш зат қойылғаны» туралы тағы да хабар алған. Осыдан кейін бірінші ауысымның сабағы бір жарым сағатқа кеш басталды. Бұл туралы Ақтөбе облыстық білім басқармасы хабарлады.
Басқарма басшысы Жолдас Батырханның сөзінше, жарылғыш зат туралы хабарлама Ақтөбедегі №1, №2, №21, №22, №51, №56 мектептің электронды поштасына таңғы сағат жеті жарымда түскен.
— Жарылғыш зат туралы хабар бұл жолы да жалған болып шықты. Интернет-террорист әлі ұсталған жоқ. Ол ертең де хабарлама жолдайтын болса, оқу процесін үзбей, арнайы құрылымдардың нұсқаулығына сай әрекет етеміз, — деді Жолдас Батырхан.
Білім басқармасы арнайы құрылымдардың қандай нұсқау бергенін ашып айтпады. Бір белгілісі, қыркүйек айынан бастап Ақтөбедегі орта білім беретін мектептер лицензиясы бар күзет қызметінің бақылауына көшкен.
Кеше, 1 қыркүйек күні де Ақтөбедегі №2 мектептің электронды поштасына қаладағы алты мектепке (№1, №2, №21, №22, №51, №56 мектеп) жарылғыш зат қойылғаны туралы хабар түскен. Осыдан кейін хабарламада көрсетілген мектептерде алғашқы қоңырау салтанаты өтпей қалды. Кейін бұл хабарлама жалған болып шыққан.
Полиция кешелі бері интернет-террористі таба алмай жатыр. Бұл дерек бойынша Қылмыстық кодекстің 273-бабымен (Терроризм актісі туралы көрінеу жалған хабарлау) сотқа дейінгі тергеу басталған.
Винтоверт DeWalt PowerStack DCF850E1T-QW АКБ и ЗУ в комплекте