Ақтаулық әйел баласымен Киевтен шыға алмай отыр

Фото: lada.kz

Ақтау тумасы баласымен құжаттары болмаған соң Киевтен шыға алмай отыр. Себебі украиналық тарап үш жыл бойы баланың туу туралы куәлігін беруден бас тартқан. Қазақстанның Украинадағы елшілігі жағдайға қатысты пікір білдірді, — деп хабарлайды Tengrinews.kz тілшісі Lada.kz сайтына сілтеме жасап.

Киевте баласымен тұрып жатқан әйелдің анасы Татьяна Жежельдің айтуынша, қызы Ақтауға шыға алмайды. Себебі төрт жасар баласының туу туралы куәлігі жоқ, тек перзентханадан анықтама бар.

«Украина тарапы бала дүниеге келген сәттен бастап туу туралы куәлік беруден бас тартты, өйткені баланың әкесімен неке тіркелмеген. Біздің консулдық баланың туған жері бойынша АХАЖ-ға барсын деді, ал олар консулдыққа жіберіледі. Үш жыл болды. Пандемия кезінде қызымның қазақстандық шетелдік төлқұжатының қолдану мерзімі аяқталды, консулдық оны ұзартпайды. Қызыма баласын тастап, Қазақстанға барып, жаңа төлқұжат алып, қайтуды ұсынды. Қандай ана баласын тастап кетеді? Қазір әскери іс-қимылдар болып жатса да, оған көмектесуден бас тартылды», — деді әйел.

Татьянаның қызы Ольга Рагозинаның айтуынша, ол бірнеше рет консулдықтан көмек сұраған, алайда олар мәселені шеше алмайтынын айтқан.

Қазақстанның Украинадағы елшілігі былтыр 21 қарашада Ольга Киевтің орталық АХАЖ арқылы туу туралы куәлікті рәсімдеуге немесе Қазақстанда төлқұжатын жаңартуға мүмкіндік алғанын хабарлады. Бұл екі ұсынысты да елемегенін айтты.

«Біз куәлікті өз бетімізше рәсімдей алмадық. Тіпті Әділет министрлігімен кеңестік, өйткені оның төлқұжатының мерзімі өткен, некеде де жоқ», — деді елшілік өкілдері.

Осыған қарамастан, елшілік Ақтау тумасының мәселесін шешуге уәде берді.