Экс-спикердің ұлы «Қазфосфат» қаржысын жымқырды деген күдікке ілінді
«Қазфосфат» минерал тыңайтқыш зауытының жетекшісіне қатысты 697 млн теңге жымқырды деген күдікпен іс қозғалған. Бұл жөнінде Қазақстанның бас прокуратурасы мәлімдеді.
Қылмыстық істі 13 шілдеде Жамбыл облысының экономикалық тергеулер департаменті тіркеген. «Монополия қызметі» бабы бойынша тергеу аймақтық бәсекені қорғау және дамыту департаментінің қорытындысы негізінде басталған.
Осының алдында қаржы мониторинг агенттігі «аммофосты» қымбатқа сату арқылы «заңсыз табыс тауып», «монополия жағдайын асыра пайдалану» фактісі тіркелгенін мәлімдеген.
Қасым-Жомарт Тоқаев үкіметтің кеңейтілген отырысында тыңайтқыш зауыты үлестес компанияға өнімінің едәуір бөлігін сатып, өз кезегінде ол оны 30 пайызға қымбаттатып сатқанын айтқан.
«Қазфосфат» зауытын мәжілістің бұрынғы спикері Нұрлан Нығматулиннің ұлы Нұрхан Нұрланов басқарады.
Қаңтар оқиғасынан кейін экс-президент Нұрсұлтан Назарбаевқа жақын бірқатар жоғары лауазымды тұлғалар қызметінен айырылған. Нұрлан Нығматулин 1 ақпанда мәжіліс спикері қызметінен кетті.
Бірнеше күн бұрын «Қазфосфат» зауытында апат болып, Тараз қаласын көк түтін басқаны хабарланды. Тұрғындар тыныс алудың қиындағанына шағымданды.
Экология министрлігі бастапқыда фторсутек қалыпты нормадан екі-үш есеге артты, аммиак, күкіртсутек, көмірқышқыл газының артық мөлшері анықталмады деп хабарлаған.
Кейін ластаушы заттардың артық мөлшері анықталмады деп мәлімдеген. Жамбыл облысының әкімдігі «тұрғындар денсаулығына қауіп жоғын» айтты.
Винтоверт DeWalt PowerStack DCF850E1T-QW АКБ и ЗУ в комплекте