МАЭК-тегі апат: Тоқаев «ҚазМұнайГаз» басшысы мен энергетика вице-министріне сөгіс жариялады
Қазақстан президенті Қасым-Жомарт Тоқаев Маңғыстау атом энергетикалық комбинаты (МАЭК) мен Атырау мұнай өңдеу зауытында (АМӨЗ) болған апатқа байланысты «ҚазМұнайГаз» басшысы мен энергетика вице-министріне сөгіс жариялады.
Президент «ҚазМұнайГаз” басшысы Мағзұм Мырзағалиевке «мұнай өңдеу зауытының қауіпсіздігі мен тұрақты жұмысын уақтылы қамтамасыз ете алмағаны» үшін, энергетика вице-министрі Жандос Нұрмағанбетовке «батыс энергия торабының қауіпсіздігіне тиісті деңгейде бақылау жасамағаны үшін» сөгіс берген.
Ақорда МАЭК, АМӨЗ мекемелері және елдегі электр желілеріне жауапты KEGOC компаниясының басшылары мен лауазымды тұлғаларына қатысты әкімшілік шаралар қолданылатынын мәлімдеді.
Маңғыстау облысын ғана емес БҚО, Атырау облысының бір бөлігін электр энергиясымен қамтамасыз етіп отырған МАЭК-те 3 шілдеде қазандыққа келіп тұратын тоқтың күрт өсуіне байланысты №1 энергия блогы істен шыққан еді.
Апаттан соң Атырау облысындағы бірнеше аудан мен ауыл, Атырау қаласындағы көптеген шағын аудан мен ауылында жарық өшіп, ауыз су тоқтады. Көшелердегі бағдаршамдар істен шығып, көлік кептелісі болды. Комбинаттағы апаттан «Атырау мұнай өңдеу зауытында» (АМӨЗ) электр қуаты өшіп, соның салдарынан бір мұнарада өрт болған.
Энергетика министрлігі апатқа құрал-жабдықтардың әбден тозуы, кәсіпорын дұрыс қаржыландырылмайтыны себеп болғанын мойындады.
Винтоверт DeWalt PowerStack DCF850E1T-QW АКБ и ЗУ в комплекте