Былтыр 8 мың адам оңтүстіктен солтүстікке көшіп барған
Былтыр 8 мың адам оңтүстіктен солтүстікке көшіп барды деп хабарлайды еңбек және халықты әлеуметтік қорғау министрлігі. Мекеме көшіп барғандар мемлекеттен көмек алғанын жеткізді.
«Мықты аймақтар — ел дамуының қозғаушысы» ұлттық жобасы аясында 7923 адам өз еркімен солтүстік аймаққа көшіп барды. Олардың арасында 1320 қандас және 6603 қоныс аударушы бар», — деп хабарлайды еңбек министрлігі.
Қоныс аударушылардың арасында 3652 адам еңбекке бейімді деп танылған. Олардың 2811-і тұрақты жұмысқа орналасқан. 7622 адамға бір реттік көмек берілген. 5633 азаматтың баспана ақысы төленіп жатқаны айтылады.
Аталған Ұлттық жоба аясында мемлекет тарапынан төмендегідей көмек беріледі:
көшу үшін субсидия — Отбасының әрбір адамына 70 Айлық есептік көрсеткіш көлемінде бір реттік көмек;
Бір жыл көлемінде пәтер ақысы мен коммуналдық төлемдерді төлеу;
қысқа мерзімге кәсіби білім алуға жіберу;
жұмысқа орналасуға көмектесу немесе жеке кәсібін дамытуға қолдау көрсету.